የሕይወት ዓላማ ምንድር ነው?

ዘፍ. 2-3 አዳም በእግዚአብሔር አምሳል እንደተፈጠረና ከእግዚአብሔር ጋር ግንኙነትን የማድረግ ችሎታ እንደተሰጠው ይነግረናል። ይህ ታሪክ ንግግርን፥ መተባበርን፥ ግንኙነትንና ኅብረትን ይገልጣል።

የእግዚአብሔር የግንኙነት ምኞት ከአዳም ጋር ብቻ የተወሰነ አይደለም። ከእስራኤል ጋርም የቃል ኪዳን ግንኙነት ወስጥ ገብቷል። ‘በመካከላችሁም እሄዳለሁ፥ እኔም አምላክ እሆናችኋለሁ፥ እናንተም ሕዝብ ትሆኑኛላችሁ።’ (ዘሌ. 26፥12) ኢየሱስ የግንኙነትን አስፈላጊነት ለደቀ መዛሙርቱ ሲያጸና በእርሱ እንዲኖሩ አስተማራቸው (ዮሐ. 15፥1-10)፤ ደግሞም ለሚወድዱት ራሱን እንደሚገልጥ (ዮሐ. 14፥21) እንዲሁም ተከታዮቹን ወዳጆች በማለት ጠራቸው (ዮሐ. 15፥15)። እነዚህ ምንባቦች እያንዳንዳቸው እግዚአብሔር ግንኙነትን እንደሚሻ ያሳያሉ።

ሁሉ ኃጢአትን ሠርተዋልና የእግዚአብሔርም ክብር ጎድሎአቸዋል፤ (ሮሜ 3፥23) ኃጢአት የእግዚአብሔርን ሕግ መጣስ ነው፤ ኃጢአት ደግሞ ቅጣት አለው። ሮሜ. 6፥23 ይህንን የእግዚአብሔርን ሕግ የመጣስ ቅጣት ይነግረናል፤ ‘የኃጢአት ደመወዝ ሞት ነውና፤ . . .’ ደመወዝ ማለት ስላደረግነው ነገር የምንቀበለው ዋጋ ነው። እንደ መጽሐፍ ቅዱስ ትምህርት እኛ ሁላችን ዋጋችን ሞት ነው።

መጽሐፍ ቅዱስ ስለ ሞት ሲናገር በዋናነት ስለ መለየት መናገሩ ነው። በሥጋ ስንሞት ነፍሳችን ከሥጋችን ይለያል። በተመሳሳይ ሁኔታ፥ በኃጢአት ምክንያት በመንፈስ ስንሞት ደግሞ፥ የኛ መንፈስ ከእግዚአብሔር መንፈስ ይለያል። ‘ነገር ግን በደላችሁ [ወይም ኃጢአታችሁ] በእናንተና በአምላካችሁ መካከል ለይታለች፤’ (ኢሳ. 59፥2)።

ብዙ ሰዎች በመልካም ሥራቸው እግዚአብሔር እንደሚቀበላቸው ይመስላቸዋል። እውነቱ ግን ‘ቅቡል የሆነ መልካምነት’ መለካት የማይቻል መሆኑ ነው። መጽሐፍ ቅዱስ፥ ‘ብዙውን ጊዜ መልካም ብትሆን እግዚአብሔር ይቀበልሃል።’ አይልም። ‘ሦስት መልካም ሥራዎች አንዱን መጥፎ ያጣፉታል።’ አይልም። የመልካምነት መለኪያ በሌለበት፥ እንዴት ነው መልካምነት ሊያድን የሚችል መልካምነት የሚሆነው?

መጽሐፍ ቅዱስ ችግራችን የመልካምነት እጦት ሳይሆን የኃጢአት መዘዝ መሆኑን ያስተምረናል። እኛ ከእግዚአብሔር ጋር ያለንን ግንኙነት ከቶም ማስታረቅ አንችልም፤ ምክንያቱም ኃጢአት ሞትንና መሳትን አምጥቶብናልና። ኤፌ. 2፥1 ከክርስቶስ ውጪ እኛ በኃጢአታችንና በበደላችን ምክንያት ሙታን መሆናችንን ይነግረናል። 2ቆሮ. 4፥3-4 ያለ እግዚአብሔር ጣልቃ ገብነት በዚህ ዓለም አምላክ ለእውነት የታወርን መሆናችንን ይነግረናል። እኛ ከእግዚአብሔር ጋር ለመታረቅ ማድረግ የምንችለው ምንም ነገር የለም፤ ምክንያቱም ሙታን ምንም ማድረግ አምይችሉም፤ የሳቱ ሰዎችም ማመን አይችሉም።

የኃጢአት ደመወዝ ሞት ነው። ኢየሱስ የኃጢአታችንን ቅጣት ሊከፍል በመስቀል ሞተ። የእርሱ መሥዋዕትነት እርቅን አስገኝቶልናል። ሮሜ 5፥10 እንዲህ ይላል፤ ‘ጠላቶች ሳለን ከእግዚአብሔር ጋር በልጁ ሞት ከታረቅን፥ ይልቁንም ከታረቅን በኋላ በሕይወቱ እንድናለን።’

የኢየሱስ ሞት የኃጢአት ዕዳችንን ቢከፍለውም፥ የኢየሱስ ትንሣኤ ነው የዘላለማዊ ሕይወት ተስፋን ያስጨበጠን። ‘ኢየሱስ ክርስቶስ ከሙታን በመነሣቱ ለሕያው ተስፋና ለማይጠፋ፥ እድፈትም ለሌለበት፥ ለማያልፍም ርስት እንደ ምሕረቱ ብዛት ሁለተኛ የወለደን የጌታችን የኢየሱስ ክርስቶስ አምላክና አባት ይባረክ፤’ 1ጴጥ. 1፥3።
የኢየሱስ ሞት የኃጢአት ዕዳችንን ከፍሎታል፤ የኢየሱስ ትንሣኤ ግንኙነትን እውን አድርጎታል።

ኢየሱስ ስለ ዘላለም ሕይወት ብዙ ጊዜ ተናግሮአል (ዮሐ. 3፥15-16፤ 4፥14፤ 5፥39፤ 6፥40)። ብዙ ሰዎች የዘላለም ሕይወት የሚመስላቸው ሞተው መንግሥተ ሰማያት ሲሄዱ ነው። ያ ግን ኢየሱስ ያስተማረው ግን ያንን አይደለም። በዮሐ. 17፥3 ‘እውነተኛ አምላክ ብቻ የሆንህ አንተን . . . ያውቁ ዘንድ ይህች የዘላለም ሕይወት ናት።’ አለ። የዘላለም ሕይወት እግዚአብሔርን ማወቅ ነው፤ ያም የእርቅ ግንኙነትን መለማመድ ነው።

እንደ መጽሐፍ ቅዱስ ትምህርት የዘላለም ሕይወት ከኃጢአታቸው ተመልሰው እምነታቸውን ኢየሱስ በሠራው ሥራ ላይ ላደረጉት ይሰጣል። መጽሐፍ ቅዱስ ይህንን የመመለስ ተግባር ንስሐ ብሎ ይጠራዋል። ይህ ማለት ያ ሰው ኃጢአት የለሽ ይሆናል ማለት አይደለም። ነገር ግን ከኃጢአት ድርጊቶች ይበልጥ እግዚአብሔርን ይፈልጋል ማለት ነው።